التفاحة لم تكن فاسدة
قبل 7 أعوام
مش هعيش
لما انت عارف اننا محناش لبعض
وان حكايتنا هتنتهى بفراق وبعد
عيشتنى ليه فالسما
وفرشت من تحتى النجوم
غطتنى ليه بنور القمر
ووقفت حارس م الغيوم
خايف لتحجب نوره عنى
والا خايف لا الضباب يحرمك من نظره منى
والا صوتى متسمعوش لما اغنى
وازاى تخاف وانت اصلا حته منى
طب سبنا ايه بقى للتمنى
واتنمى ايه
وانا عايشه اكتر ماللى ياما حلمت بيه
هنا فى السما
الطير يعدى جنبنا
انا اخاف
لعيونه تحسد حبنا
وانت تخاف
لعيونه تلمحنى انا
وتغير عليا من عنيه
وتلوم عليه
طب ذنبه ايه
معذور مشافشى زينا
خايف لا كل الى يحبوا
يطلعوا هنا جنبنا
وساعتها فين يلقى مكان جواه يطير
الحكايه
مش بس انه بدا يغير
الحكايه
انه خايف ييجى يوم
فالفضا يصبح اسير
عشان كدا
واجب عليا اعرفه
ان المكان دا ماحد غيرنا هيعرفه
واحنا ضيوف
هنعيش هنا وسط السحاب
واما يكون جوانا شوق
نجرى سوا تحت المطر
ننده سحابه ترشنا
تصبغ حياتنا باحلى طيف
واما نحس الجو صيف
ناخد سحاب وندوبه
نعمل بحيره صغيره على قدنا
واما ننادى الشمس تطلع
البحيره تختفى
تصبح بخار
شايل هموم
محكوم عليها تتنفى
لكن ساعتها
حسيت بشمعه حبنا
جوه قلبك
بدات تهدى وتنطفى
ولقيت ايدينا سايبه بعض
وسمعت رعد
فجاه السما مبقتش صافيه
ولقتنى بنزل من هنا
لاايديا طايلاك فى السما
ولا رجلى كانت طايله ارض
ولقتنى مش متطمنه
وروحى حست بالقلق
ونادتنى من فوق فى السما
على فكره لازم نفترق
حسيت ساعتها بروحى منى بتتسرق
حسيتنى مركب ياما عافر ويا موجه
بس فى الاخر غرق
انت خلاص
قررت فجاه تعيش هناك مع حد غيرى
انت تعيش وانا مش مهم انا ايه مصيرى
وازاى انا بعدك هعيش
فاكرنى زيك والهوا ميهمنيش
حبتنى ليه
لما انت مش قد الغرام
وجاى تقوللى
انا لسه مش قد المقام
كده بساطه
ياسلااااااااااام
لأ جديده
موزونه لكن جوها مش مناسب للقصيده
القصيده اللى اتفقنا انها هتعيش سعيده
لكن نسينا نتفق ان النهايه تكون سعيده
لكن مادمنا اكيد خلاص راح نفترق
والقصه دى صبحت مفيش
ممكن طلب ممكن
وقبل ماتمشى اعرف
لما يموت قلبى بعدك ازاى هعيش
والا بلاش
اصل الاكيد بعد حكايتنا ماتنهى
انا مش هعيش
