اصحاب اغراب
كنا زمان فى القرب اصحاب
كنا زمان فى القرب حبايب
من غير حتى مانبقى احبه
كنا اصحاب
فجاه احبه
وكمان فجاه رمتنا فغربه
حتى الكلمه الحلوه مابينا
صبحت صعبه
كنت اتمنى
نفضل دايما زى ماكنا
كنا بنشكى لبعض همومنا
كنا بنمحى لبعض المنا
من غير حتى ماننطق كلمه
كنا وكنا
لكن كل دا اصبح ماضى
اصل العادى
انك مهما قدرت تصون العشرة اكيد هتفارق
بس الفارق
انك تمشى سايب ذكرى جميله هناك
مش تختمها بخدعه وتمشى
وتسيب فيها قلوب كارهاك
بس الاسوا
ان انا قلبى لسه مصدق
انك ممكن تبقى ملاك
وان الحاصل غصبن عنك
وانك مغدرتش بالعشرة
وانك راجع
بس فى حاجه اكيد مانعاك
لكن برضه لو انت رجعت
مش راح نقدر نبقى اصحاب
ولا يوم كنا لبعض حبايب
احنا بقينا خلاص اغراب
وانا هعتبرك صاحب غايب